Böyüklərdə olduğu kimi, uşaqlarda da COVID-19 xəstəliyi ağır fəsadlara gətirib çıxara bilər.

Aztibb.az xəbər verir ki, bunu “Həkim məsləhəti” rubrikasında pediatr-neonatoloq Aygün Sadıxova deyib.

O, bildirib ki, uşaqların da koronavirus infeksiyasından qorunması üçün bütün qaydalara riayət olunmalıdır: "Xüsusilə 12 yaşa qədər olan uşaqların maskadan istifadəsi ehtiyatla aparılmalıdır ki, maska onlar üçün əlavə infeksiya mənbəyinə çevrilməsin. Koronavirusa qarşı effektiv peyvənd tapılana qədər uşaqları qorumaq lazımdır".

A.Sadıxova uşaqlara doğulduğu gündən bütün peyvəndlərin vurulmalı olduğunu qeyd edib. Onun sözlərinə görə, digər xəstəliklərə qarşı peyvəndləri vurulmayan uşaqlar virusa yoluxarsa, xəstəliyi daha ağır keçirə bilərlər. Bir yaşa qədər uşaqlarda COVID-19 virusu ağırlaşmalara səbəb ola bilər.

"COVID-19 virusu yenidoğulmuş uşaqlarda respiratir distress sindromunun yaranmasına və körpənin süni tənəffüs aparatına qoşulmasına səbəb ola bilər. Həmçinin bu virusa yoluxan uşaqlar xəstəliyi yüngül keçirsələr də, daşıyıcı ola bilərlər. Bir uşaqda COVID-19 xəstəliyi aşkarlanıbsa, əksər hallarda ailənin digər üzvləri də yoluxmuş olub. Buna görə də, uşaqlar həyətdə oynadıqda mütləq ara məsafəsi saxlamaq, maskadan düzgün istifadə etmək, uşaqların əllərini qaydalara uyğun yumaq, yelləncəyə mindirdikdə tutacaqları dezinfeksiya etmək və onları kütləvi yerlərə aparmamaq lazımdır, - deyə həkim vurğulayıb.