Təhsil Nazirliyi Gənclərin Respublika Bədii Yaradıcılıq Evinin təşkilatçılığı ilə 10 dekabr 2021-ci il tarixdə Azərbaycan Turizm və Menecment Universitetində “Gənclik dövründə sağlam həyat tərzi və reproduktiv sağlamlıq” mövzusunda maarifləndirici tədbir keçirilib.
Aztibb.az xəbər verir ki, gənclərin reproduktiv sağlamlıq və ailə planlaşdırılmasına dair biliklərinin artırılması və davranışının təkmilləşdirilməsi məqsədilə təşkil olunan tədbirdə Səhiyyə Nazirliyinin İctimai Səhiyyə və İslahatlar Mərkəzinin həkim-metodisti Afət Məmmədova geniş təqdimatla çıxış edib. O, sağlam həyat tərzi və reproduktiv sağlamlıq, cinsi yolla yoluxan infeksiyalar və ailə planlaşdırılması, erkən nikahların fəsadları və digər mövzular barədə ətraflı məlumat verib, gəncləri maraqlandıran sualları cavablandırıb.
Maarifləndirici tədbirdə gənclərə sağlam həyat tərzi seçərək zərərli vərdişlərdən uzaq olmaq tövsiyə olunub, gənc yaşlarda reproduktiv sağlamlığı qorumağın vacibliyi vurğulanıb.
