Bakı Sağlamlıq Mərkəzində “Vərəm xəstəliyinin əhali arasında geniş yayılmasının qarşısının alınması, xəstəliyin erkən aşkarlanması və xəstələrin müayinəyə cəlb olunması” mövzusunda seminar keçirilib.

Aztibb.az-ın məlumatına görə, Bakının 83 tibb müəssisəsindən olan əməkdaşların iştirakı ilə keçirilən seminarda respublikanın baş ftiziatrı, Əziz Əliyev adına Azərbaycan Dövlət Həkimləri Təkmilləşdirmə İnstitutunun Ftiziatriya kafedrasının professoru Yavər Şıxəliyev “Vərəm xəstəliyinin erkən aşkarlanması metodlarının müasir aspektləri” mövzusunda çıxış edib.

Yavər Şıxəliyev çıxışında vərəmin aktiv və passiv aşkarlanma metodları, uşaq və yeniyetmələr arasında immunodiaqnostikanın rolu haqqında məlumat verib, kliniki müşahidələrin illüstrasiyaları slaydlar vasitəsilə təqdim olunub. Eyni zamanda, passiv aşkarlanmada sürətləndirilmiş molekulyar genetik metod “GeneXpert MBT RİF”lə yanaşı sadə mikroskopiya metodlarının epidemioloji rolu izah edilib. Aktiv aşkarlanmada isə müasir rəqəmsal mobil flüoroqraf aparatlarının effektli işləməsi üçün risk qruplarının seçilmə taktikası və onların müayinəyə cəlb olunması məsələləri araşdırılıb.