Aztibb.az xəbər verir ki, tədbirin təşkilində məqsəd – şagirdlərin sağlam həyat tərzi barədə dünyagörüşünün formalaşdırılması, narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı maarifləndirmənin aparılması idi.

 

Səhiyyə Nazirliyinin İctimai Səhiyyə və İslahatlar Mərkəzinin Layihələrin əlaqələndirilməsi şöbəsinin müdir müavini Ülkər Camalova tədbirdə çıxış edərək, narkomaniyanın və psixotrop maddələrin insan sağlamlığına mənfi təsiri barədə ətraflı məlumat verdi, narkotik maddələrdən istifadənin qısa zamanda fiziki və psixi asılılıq yaratdığını nəzərə çatdırdı.

 

Nəsimi Rayon Polis İdarəsinin rəisi Mirnemət Mirbabayev respublikamızda narkomaniyaya qarşı mübarizə sahəsində görülən işlərdən söz açdı, yeniyetmələri, gəncləri zərərli vərdişlərdən uzaq olmağa çağırdı.

 

Məktəbin direktoru Sevinc Budaqova zərərli vərdişlərlə mübarizədə maarifləndirici görüşlərin əhəmiyyətini vurğulayaraq, yeniyetmələri sağlam həyat tərzi keçirməyə, ətraf aləmin gözəlliklərindən – təbiətdən, kitablardan, maraqlı insanlarla ünsiyyətdən zövq almağa, faydalı bilik və bacarıqlar öyrənməyə çağırdı.

 

Tədbirin sonunda iştirakçıları maraqlandıran suallar cavablandırıldı və onlara maarifləndirici materiallar paylanıldı.