“Autizm - Defektoloji və Psixoloji Yardım Mərkəzi” İctimai Birliyinin sağlamlıq imkanları məhdud olan autizmli uşaqlara psixo-sosial reabilitasiya xidmətlərinin göstərilməsi məqsədilə hazırlanmış maarifləndirici onlayn platformanın təqdimatı keçirilib.
Aztibb.az xəbər verir ki, təqdimatda “Autizm - Defektoloji və Psixoloji Yardım Mərkəzi” İB rəhbərliyi, müvafiq ictimai birliklər, Əmək və Əhalinin Sosial Müdafiəsi Nazirliyi və Ombudsman aparatının nümayəndələri, eyni zamanda, psixoloq-defektoloqlar iştirak ediblər.
İctimai Birliyin rəhbəri Çiçək Məmmədli Autizm.az saytının məqsədi və birliyin gələcək planları barədə məlumat verib. Bildirilib ki, autizmli uşaqların cəmiyyətə inteqrasiyası sahəsində ailələrin bilik və bacarıqlarının inkişaf etdirilməsi Aautizm.az saytının əsas missiyasıdır. Onun dediyinə görə, XXI əsrin qlobal problemi hesab edilən autizm Azərbaycanda da aktualdır: “Araşdırmalara görə, dünya əhalisinin təxminən 70 milyonu autizmdən əziyyət çəkir və təəssüflər olsun ki, dünyada, eləcə də ölkəmizdə autizmli uşaqların sayı ildən-ilə artır. Hesab edirəm ki, burada əsas problem valideynlərin autizmli uşaqları gizlətmələri, bəzi hallarda onlardan utanmalarıdır. İnklüziv cəmiyyətin formalaşması üçün vətəndaşların, xüsusilə də autizmli övladı olan valideynlərin maarifləndirilməsi zəruridir. Hazırda Autizm - Defektoloji və Psixoloji Yardım Mərkəzində minə qədər uşağa yardım göstərilir”.
O, autizm.az platformasını valideynlərin maarifləndiriməsi baxımından uğurlu addım hesab etdiyini bildirib: “Onlayn platformada müxtəlif müalicə metodları barədə videoçarxlar yerləşdirilib. Həmin videolar autizmli uşaqların əl-göz inkişafının koordinasiyası, özünəxidmət bacarığı, rəng eyniləşdirməsi, kiçik motorikanın inkişafı, nəfəs gimnastikası və s. sahələri əhatə edir. Müxtəlif psixoloqlar tərəfindən hazırlanmış videolar autizmli övladı olan valideynlər üçün çox faydalıdır. Valideynlər həmin maarifləndirici videoları izləyərək müxtəlif metodları övladlarında tətbiq edə və bəhrəsini görə bilərlər. Gələcəkdə platformada yerləşdirilən təlim və reabilitasiya metodlarının nümayiş etdirildiyi videoların sayının artırılması planlaşdırılıb. İctimai Birliyin növbəti uğurlu addımlarından biri olan onlayn platformanın autizmli uşaqlarla iş sahəsində mühüm töhfə verəcəyinə inanıram”.