Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini, t.f.d., dosent İsmayıl Əfəndiyev, Elmi-Təcrübi və Tədris Mərkəzinin mütəxəssisi Azad Əhmədov və Mərkəzi Gömrük Hospitalının həkim-infeksionisti Mədinə Abdullayeva əməkdaşlıq haqqında ikitərəfli memorandum çərçivəsində Azərbaycan Milli Elmlər Akademiyasının Fiziologiya İnstitutunda işgüzar görüş keçiriblər.

Aztibb.az xəbər verir ki, görüşdə AMEA Fiziologiya İnstitutunun direktoru, biologiya elmləri doktoru Ulduz Həşimova yeni koronavirus pandemiyası dövründə Azərbaycan Respublikası Dövlət Gömrük Komitəsi Tibbi Xidmət İdarəsinin Mərkəzi Hospitalı ilə aparılan birgə elmi araşdırmalar sahəsində əldə edilmiş nəticələrdən məmnunluğunu ifadə edib. O, COVID-19 xəstəliyinin ağır klinik gedişi ehtimal edilən və risk qrupuna daxil olan pasiyentlərin aşkar edilməsi sahəsində gələcək əməkdaşlıq haqqında öz düşüncələrini bölüşüb.

Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini, t.f.d., dosent İsmayıl Əfəndiyev COVID-19 xəstələrində və postkovid sindromundan əziyyət çəkən şəxslərdə müxtəlif tibbi, bioloji və psixoloji aspektlərin birgə tədqiq edilməsinin, o cümlədən aparılan elmi araşdırmalara Mərkəzi Gömrük Hospitalının gənc mütəxəssisləri və həkim-rezidentlərinin cəlb olunmasının əhəmiyyətini qeyd edib, birgə elmi seminar və simpoziumların keçirilməsinin vacibliyini vurğulayıb.

Konstruktiv fikir mübadiləsi şəraitində keçən görüşdə tərəflər arasında əməkdaşlığın daha da genişləndirilməsi, birgə elmi nəşrlər və ikitərəfli fəaliyyətin digər aspektləri haqqında ilkin razılıq əldə olunub.