Beynəlxalq Əfv Təşkilatının məlumatına görə, dünyada ən azı 7 mindən çox səhiyyə işçisi COVID-19-dan dünyasını dəyişib. Təkcə Meksikada 1320 səhiyyə işçisinin öldüyü təsdiqlənib. Beləliklə, Meksika dünyada ən çox sayda səhiyyə işçisi itkisi olan ölkə kimi qeyd olunub.

Bundan başqa, ABŞ-da 1077, İngiltərədə 649, Braziliyada 634, Rusiyada 631, Hindistanda 573, Cənubi Afrikada 240, İtaliyada 188, Peruda 183, İranda 164, Misirdə 159 səhiyyə işçisinin həyatını itirdiyi bildirilir.

Təşkilatın İqtisadi və Sosial Ədalət Bölməsinin direktoru Steve Cockburn mövzu ilə bağlı verdiyi açıqlamada deyib ki, başqalarının həyatını xilas etməyə çalışan 7 mindən çox insanın ölümü sarsıdıcıdır. Səhiyyə işçilərinin öz həyatlarına təhlükə yaratmadan işlərinə davam etmələri üçün onların kifayət qədər qoruyucu vasitələrə sahib olmalarını təmin etmək vacibdir.