İsrail COVID-19 infeksiyasının sürətlə yayılması nəticəsində ikinci total izolyasiya rejiminə doğru gedir.

Aztibb.az interfax.ru saytına istinadla bildirir ki, bu barədə Səhiyyə naziri Yoel Edelşteyn xəbərdarlıq edib. Onun sözlərinə görə, infeksiyaya yoluxma hallarının gündəlik artımı təxminən iki min səviyyəsində qalarsa və ağır xəstələrin sayı artarsa, mütləq sərt qərarlar qəbul ediləcək.

İsrail Səhiyyə Nazirliyi ötən sutka ərzində ölkədə 2 min 112 nəfərin koronavirusa yoluxduğu barədə məlumat yayıb. Bir gün öncə isə bu rəqəm 1600 idi.

“İki min yoluxma qırmızı cizgidir. Biz hazırkı məhdudiyyətlərin müsbət nəticə verib-verməyəcəyini yoxlamaq üçün daha 3-4 gün gözləyəcəyik”, - deyə nazir əlavə edib.

İsrail KİV-ləri izolyasiya rejiminin artıq həftə sonu tətbiq olunacağını istisna etmir. Ekspertlər bildirirlər ki, ölkədə koronavirusun yayılma sürəti getdikcə artır və yoluxma zəncirini qırmaq mümkün olmur.

COVID-19 infeksiyasının ikinci dalğası koalisiya hökumətində də fikir ayrılığı yaradıb. Nazirlər Kabineti sonuncu iclasında yeni məhdudiyyətlər barədə razılığa gələ bilməyib. 

Qeyd edək  ki, İsraildə indiyədək yeni növ koronavirusa yoluxanların sayı 42 min 813 nəfərə çatıb, 375 nəfər isə həyatını itirib.