Hər il dekabrın 1-i Ümumdünya QİÇS-lə Mübarizə Günü kimi qeyd edilir. Qazanılmış İmmun Çatışmazlığı Sindromu – QİÇS insanın sonrakı fəaliyyəti nəticəsində “qazandığı”, bilərəkdən və ya bilməyərəkdən tutulduğu bir bəladır.

 

Avropa ölkələrinin əksəriyyətində bu xəstəliyə düçar olanların vəziyyətini yaxşılaşdırmaq, cəmiyyətin həmin insanlara münasibətini dəyişdirmək üçün tədbirlər görülür, tibbi, maddi və digər yardımlar göstərilir.

 

Dünya ölkələrinin səhiyyə nazirlərinin əhalinin immun çatışmazlığı ilə əlaqədar 1988-ci ildə keçirilmiş sammitindən sonra Ümumdünya Səhiyyə Təşkilatı BMT-nin dəstəyi ilə hər il dekabrın 1-ni Ümumdünya QİÇS-lə Mübarizə Günü elan edib.

 

Bu gün dünyanın hər yerində əhalinin diqqəti bu problemə yönəldilir, insanlar maarifləndirilir. Xüsusilə, iqtisadi cəhətdən zəif inkişaf etmiş, təhsil səviyyəsinin aşağı olduğu ölkələrdə bu xəstəlikdən əzab çəkənlərin sayının çoxluğunu nəzərə alaraq, onlara müxtəlif proqramlar, layihələr vasitəsilə köməklik göstərilir.