Təhsil Nazirliyi Gənclərin Respublika Bədii Yaradıcılıq Evinin təşkilatçılığı ilə Azərbaycan Dövlət Pedaqoji Universitetinin nəzdindəki Azərbaycan Dövlət Pedaqoji Kollecində “Sağlam ailə, sağlam cəmiyyət” adlı maarifləndirici tədbir keçirilib.

 

"Gənclərin reproduktiv sağlamlıq və ailə planlaşdırılmasına dair biliklərinin artırılması və davranışının təkmilləşdirilməsi" mövzusunda keçirilən tədbirdə Səhiyyə Nazirliyinin İctimai Səhiyyə və İslahatlar Mərkəzinin həkim-metodisti Afət Məmmədova təqdimatla çıxış edib. O, sağlam həyat tərzi və reproduktiv sağlamlıq, cinsi yolla yoluxan infeksiyalar və ailə planlaşdırılması, erkən nikahların fəsadları və digər mövzular barədə məlumat verib, gəncləri maraqlandıran sualları cavablandırıb.

 

Tədbirdə Məktəbəqədər təhsilin şöbə müdiri Mətanət İsmayılova, Pedaqogika-psixalogiya fənn birləşmə komitəsinin sədri Ülkər Qədirova, Gənclərin Respublika Bədii Yaradıcılıq Evinin şöbə müdirləri Sevda Quliyeva, Kəmalə Muradlı və digərləri iştirak ediblər.

 

Gənclərə sağlam həyat tərzi seçərək zərərli vərdişlərdən uzaq olmaq tövsiyə olunub, gənc yaşlarda reproduktiv sağlamlığı qorumağın vacibliyi vurğulanıb.