Böyrək daşları arasında ən çox rast gəlinən daşlar oksalat daşlarıdır. Bütün böyrək daşlarının 75-80%-i  oksalatdır. Bu daşlar əsasən kalsium oksalat şəklində olur. Sidik daşı xəstəliyi yeni doğulmuşdan tutmuş yaşlı insanlara qədər hər kəsdə rast gəlinən xəstəlikdir. Oksalat daşları çox sərt daşlar olduğundan, rentgen müayinəsi zamanı asan aşkarlanır. 

Həkim-nefroloq  Müşfiq Bəbirov “Facebook” sosial şəbəkəsində oksalat daşlarının yaranmasını sürətləndirən məhsulları açıqlayıb. Həkimin sözlərinə görə, buraya ispanaq, göy soğan və kələm, çuğundur, yaşıl lobya aiddir.

Meyvələrə gəldikdə isə əncir, ərik, kivi, mandarin və s. oksalat daşlarının yaranmasına təsir edir.

O, həmçinin bildirib ki, giləmeyvələr (çiyələk, böyürtkən və s.), çay, kofe, şokolad, kakao, çərəzlər (qoz, fındıq, yerfındığı və s.), toxumlar (günəbaxan, balqabaq və s.), soya südü, kəsmik və s. böyrək daşlarını yarada bilir.

Həkim oksalat tipli böyrək daşının yaranmasına meylli olan insanlara qeyd olunan qidalardan mümkün qədər uzaq durmağı tövsiyə edib.