Aztibb.az xəbər verir ki, akademik Zərifə Əliyeva adına Milli Oftalmologiya Mərkəzinin filialları və səyyar klinikası sayəsində bütün region oftalmoloji yardımla əhatə olunur.

 

Belə ki, akademik Zərifə Əliyeva adına Milli Oftalmologiya Mərkəzi beynəlxalq standartlara cavab verən müasir diaqnostik avadanlıqlarla təchiz olunub. Mərkəzdə oftalmologiyanın bütün sahələrini əhatə edən şöbələr və yüksək ixtisaslı mütəxəssislər fəaliyyət göstərir. Ən müasir texnologiyalar əsasında işləyən diaqnostik avadanlıq və üsulların istifadəsi görmə orqanlarının anatomik və funksional parametrlərini dəqiq müəyyən etmişdir ki, bu da göz xəstəliklərinin diaqnostikası və müalicəsinin keyfiyyətini, gözün müəyyən strukturunda aparılan cərrahi əməliyyatların funksional nəticələrini qat-qat yüksəltmişdir. Mərkəzin aparıcı cərrahları dünyanın qabaqcıl oftalmoloji müəssisələrində aparılan unikal cərrahi əməliyyatları tətbiq edirlər.

 

2008-ci ildən Masallı rayonunda, 2016-cı ildən Gəncə şəhərində, 2019-cu ildən Şəki şəhərində Mərkəzin Regional mərkəzləri fəaliyyət göstərir. Bu filiallar ən müasir oftalmoloji avadanlıqlarla təhciz olunub. Regional şöbələrdə yerli əhaliyə yüksək ixtisaslı cərrahi və konservativ yardım göstərilir. Akademik Zərifə Əliyeva adına Milli Oftalmologiya Mərkəzi tərəfindən respublika rayonlarının əhalisinə təmənnasız oftalmoloji, xüsusilə cərrahi yardım göstərmək üçün 2005-ci ildə müasir diaqnostik və cərrahi avadanlıqla təchiz olunmuş Səyyar klinika təşkil edilmişdir. Səyyar klinika paytaxtda və respublikanın bir çox rayon və şəhərlərində aksiyalar keçir. Bununla yanaşı 2018-ci ildən isə Akademik Zərifə Əliyeva adına Milli Oftalmologiya Mərkəzinin Dəmiryolu Səyyar klinikası fəaliyyətə başlayıb. Bunun sayəsində dəmiryolu xətti yerləşən bütün regionlardakı əhaliyə səyyar xidmət göstərilir.

 

Həmçinin Azərbaycan Oftalmoloqlar Cəmiyyətinin təşəbbüsü ilə oftalmologiyada olan innovativ inkişaf, yenilik və nailiyyətləri müzakirə etmək məqsədilə mütəmadi olaraq beynəlxalq konfranslar, toplantılar həyata keçirilir.

 

Pandemiya dövründə hər ay digər ölkələrdən olan mütəxəssislərin də iştirakı ilə mütəmadi vebinar toplantılar keçirildi. Yeni müayinə-müalicə üsulları, korluğun qarşısının alınması üçün digər reabilitasoya tədbirləri həyata keçirilməsi ilə bağlı müzakirələr həyata keçirildi.

 

Profilaktik tədbirlər korluğun və bəzi göz xəstəliklərinin əvvəlcədən qarşısının alınmasına kömək olur.

 

Dünyada, ən azı 2,2 milyard insanın görmə qabiliyyətində pozulmalar var. Onlardan ən azı 1 milyardının qarşısı alına və ya həll oluna biləndir. Vaxtında müayinə və müalicə etməklə korluq hallarının 80 faizinin qarşısını almaq mümkündür.