Əziz Əliyev adına Azərbaycan Dövlət Həkimləri Təkmilləşdirmə İnstitutunun otorinolarinqologiya kafedrasının əməkdaşları Şimali Kipr Türk Respublikasının Girne şəhərində keçirilən 42-ci Türk Ulusal Qulaq, Burun, Boğaz və Baş Boyun Cərrahiyyəsi konqresində iştirak ediblər.
Aztibb.az xəbər verir ki, beş gün davam edən konqresin “Bəd xassəli paranazal sinus şişlərinə yanaşma” mövzusunda panel iclasları institutun otorinolarinqologiya kafedrasının müdiri, Azərbaycan Otorinolarinqologiya Cəmiyyətinin sədri, professor Nazim Hüseynovun sədrliyi ilə keçib. İnstitutun dosenti, Mərkəzi və Qərbi Asiya Qulaq, Burun, Boğaz və Baş Boyun Cərrahiyyəsi Cəmiyyətinin baş katibi Ramil Həşimli isə “Xoş xassəli qırtlaq şişlərinə yanaşma” mövzusundakı paneldə məruzə edərək elmi və klinik təcrübəsini bölüşüb.
Mərkəzi və Qərbi Asiya Qulaq, Burun, Boğaz və Baş Boyun Cərrahiyyəsi Cəmiyyətinin idarə heyətinin iclasında 2020-ci ildə keçirilməsi nəzərdə tutulan, lakin COVID-19 pandemiyası ilə əlaqədar təxirə salınan konqresin 2022-ci ilin mayında Bakıda keçirilməsi barədə qərar verilib.