Azərbaycanlı alimin həmmüəllifi olduğu beyin damarlarının anevrizmaları ilə bağlı növbəti elmi tədqiqat işi dünyanın aparıcı 7 elmi cəmiyyətinin rəsmi jurnalı olan, yüksək impakt faktorlu "Journal of Neurolnterventional Surgery"də çapa qəbul edilib. Jurnalın impakt faktoru 5.836-dir.
Aztibb.az xəbər verir ki, bu barədə Almaniya-Azərbaycan Radioloji və Neyroradioloji Cəmiyyətinin sədri Nuran Abdullayev məlumat verib.
O, bildirib ki, Köln Universiteti üzrə baş koordinator olduğu tədqiqatda müvafiq beyin damarlarının anevrizmasının yeni üsulla müalicəsinin vacib rolu sübut edilir.
""Flow diversion for internal carotid artery aneurysms with compressive neuro-ophthalmologic symptoms: clinical and anatomical results in an international multicentre study" adlı məqaləmizin nüfuzlu jurnalda çapı bir daha bu sahədə də bizim komandanın təkcə elmi yenilikləri deyil, eyni zamanda elmə istiqamət verən tədqiqatları ortaya qoyduğunu göstərir. Böyük məqsədlər uğrundakı mübarizədə bir olmaq - komanda ola bilmək özü də bir uğurdur", - deyə N.Abdullayev əlavə edib.
