Koronavirus (COVID-19) pandemiyası dövründə şəkərli diabet xəstələri ürək, qan-damar sistemi xəstəlikləri olan insanlardan sonra ikinci böyük risk qrupuna daxildir.
Aztibb.az xəbər verir ki, bu fikirləri Dövlət Gömrük Komitəsi (DGK) Tibbi Xidmət İdarəsinin rəis müavini İsmayıl Əfəndiyev noyabrın 12-də Dövlət Gömrük Komitəsi Tibbi Xidmət İdarəsi Elmi-Təcrübi və Tədris Mərkəzinin və Mərkəzi Gömrük Hospitalının birgə təşkilatçılığı ilə "Şəkərli diabet xəstəliyinə müasir yanaşma: problemlər və gələcək hədəflər" mövzusunda keçirilən vebinarda bildirib.
Şəkərli diabet xəstəliyinin insanların sağlamlığı üçün ciddi təhlükə törədən xəstəlik olduğunu vurğulayan İsmayıl Əfəndiyev bu xəstəliklə mübarizə yollarından, diabetlə birgə mübarizənin vacibliyindən danışıb, əhalinin bu xəstəliklə bağlı maarifləndirilməsinin əhəmiyyətini qeyd edib. Bildirib ki, karantin qaydaları səbəbindən insanların qapalı məkanda daha çox vaxt keçirməsi, immun sistemlərinin zəifləməsi, qidalanmadakı müəyyən problemlər və s. diabetin inkişafı riskini daha da artırır.
Rəis müavini qeyd edib ki, müxtəlif hesablamalara əsasən, hər il 1 milyondan 5 milyonadək insan şəkərli diabet xəstəliyindən həyatını itirir və bu rəqəm ilbəil daha da artır.
İ.Əfəndiyevin sözlərinə görə, hazırda diabet xəstələri inkişaf edən ağırlaşmalar səbəbindən yaranan korluq, ətrafların itirilməsi, müxtəlif ürək, damar problemləri ilə əlaqədar olan fəsadlara görə ölüm səbəblərinin ilk üçlüyünə daxildirlər.