“Həkimlər və tibb işçiləri kredit ballarını konfranslarda iştirak yolu ilə əldə edə bilərlər. Bu zaman bilavasitə konfransda iştirak edənlərə tədbirin hər saatına görə 1 bal, konfransda onlayn təqdimatla çıxış edənlərə 5 bal verilir”.

Aztibb.az xəbər verir ki, bu barədə TƏBİB və REAL TV-nin birgə layihəsi olan “TƏBİB məsləhəti” proqramının “Tibb işçilərinin bilik və bacarıqlarının artırılması istiqamətində təlimlər” mövzusunda canlı yayımında TƏBİB-in Elmi-tədqiqat və təhsil departamentinin Davamlı tibbi təhsil və tibbi təlimlər şöbəsinin müdiri Emil İskəndərov məlumat verib.

O, bildirib ki, 20 iyun 2017-ci il tarixindən Səhiyyə Nazirliyi tərəfindən “Həkimlərin və tibb işçilərinin bilik və bacarıqlarının təkmilləşdirilməsinə dair müvəqqəti Qaydalar” qüvvəyə minib. Bu qaydalara əsasən, həkimlər hər 5 ildən bir sertifikasiya imtahanından keçməli və 5 il ərzində 240 (bir il ərzində minimum 48 kredit balı) kredit balı toplamalıdırlar.

E.İskəndərovun bildirdiyinə görə, bundan əlavə, məqalələr, monoqrafiyalar, dərsliklər yazmaq, modular hazırlamaq yolu ilə kredit balı qazanmaq mümkündür. Elmi tədqiqatlarla məşğul olan həkimlərə isə fəlsəfə doktorluğu dissertasiyalarının yazılması üçün il ərzində 48 bal, doktorluq dissertasiyalarının yazılması üçün 60 kredit balı verilir.

“Distant davamlı təhsil vasitəsilə audiovizual dinləmələr yolu ilə kredit ballarının qazanılması mümkündür”, - deyə mütəxəssis qeyd edib.