Noyabrın 20-də Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzi, Mərkəzi Gömrük Hospitalı və Gömrük Hospitalının rəsmi tərəfdaşı olan "Florence Nightingale" Xəstəxanalar Qrupunun birgə təşkilatçılığı ilə "COVID 19: Erkən və gecikmiş fəsadlar" mövzusunda beynəlxalq elmi konfrans keçiriləcək.

 

Aztibb.az xəbər verir ki, tədbir 18-24 noyabr - Ümumdünya Antibiotiklərlə Bağlı Maarifləndirmə Həftəsinə həsr olunacaq.

 

Hibrid formatda keçirilməsi planlaşdırılan konfransda “COVID-19: Erkən fəsadlar” və “COVID-19: Gecikmiş fəsadlar” başlıqlı 2 paneldə Azərbaycan və Türkiyədən olan yüksəkixtisaslı mütəxəssislər tərəfindən ümumilikdə 19 məruzə dinləniləcək.

 

Tədbir panel müzakirələri və sual-cavab sessiyaları ilə interaktiv şəkildə aparılacaq.

 

Proqrama uyğun olaraq ürək-damar cərrahı, infeksionist, terapevt, endokrinoloq, anestezioloq-reanimatoloq, nevropatoloq, fizioterapevt, radioloq, qastroenteroloq, nefroloq, oftalmoloq, dermatoveneroloq, psixiatr və pulmonoloq ixtisaslarından olan mütəxəssislər konfransda əyani şəkildə iştirak edə bilərlər.

 

Beynəlxalq tədbirdə əyani şəkildə iştirak edəcək şəxslərin “COVID-19 vaksin sertifikatı” və ya “COVID-19 immunitet sertifikatı”nın olması mütləqdir. Konfransa, eyni zamanda distant şəkildə "ZOOM" proqramı vasitəsilə də qoşulmaq mümkündür. 

 

Proqramın 80 faizini tamamlayan hər bir iştirakçıya sertifikat veriləcək.

 

Qeyd edək ki, konfransın akkreditasiya edilməsi üçün Səhiyyə Nazirliyinə müraciət edilmişdir.

 

Tədbirdə iştirak ödənişsizdir. 

 

Yerlər məhdud olduğu üçün həm əyani, həm onlayn iştirak üçün qeydiyyatdan keçmək mütləqdir!

 

Qeydiyyatdan keçmək üçün link: https://forms.gle/6HHSBdMPpQ3AKU4j7

 

Proqramla tanış olmaq üçün link: https://customshospital.az/.../2021/11/proqram-veb.pdf