Yeni növ koronavirus (COVID-19) pandemiyası ilə mübarizədə kütləvi vaksinasiya ən uğurlu və səmərəli tədbirlərdən biridir. Bunu nəzərə alaraq, Avropa İttifaqının maliyyələşdirdiyi “COVID-19: vaksinasiyaya dəstək” layihəsi Azərbaycanda da həyata keçirilir. Layihə çərçivəsində ÜST-ün Azərbaycan nümayəndəliyi tərəfindən 50 səhiyyə işçisinin təlimçi kimi hazırlanması məqsədilə paytaxtdakı “Yeni klinika”da “Təlimçilərin təlimi” proqramına start verilib. Əziz Əliyev adına Azərbaycan Dövlət Həkimləri Təkmilləşdirmə İnstitutunun pediatriya kafedrasının dosenti Mətanət Qaraxanova və yoluxucu xəstəliklər kafedrasının assistenti Arzu Hüseynova da həmin təlimlərə cəlb olunublar.

İnstitutun mətbuat xidmətindən verilən məlumata görə, təlim proqramı iştirakçılara COVID-19 vaksinlərinə dair ən son məlumatlarin verilməsi və vaksinasiya sessiyalarının keçirilməsi ilə əlaqədar praktiki bacarıqların göstərilməsi, həmçinin vaksinlərin təhlükəsizliyi və əhəmiyyəti barədə insanlarla ünsiyyət bacarıqlarının gücləndirilməsi məqsədi daşıyır. Hazırlanmış təlimçilərin əldə etdikləri bilik və bacarıqları paylaşmaq üçün bu ilin sonunadək ölkənin müxtəlif bölgələrində yerləşən 14 təlim mərkəzində 2500-dən çox tibb işçisinə təlimlər keçmək nəzərdə tutulub.

İnstitutda proqram çərçivəsində keçirilən kurslar davam edir. Kurslar 3 günlük təlim proqramından ibarətdir. Təlimlərdə təqdimatlarla yanaşı praktiki məşğələlərə və tapşırıqlara da ətraflı yer ayrılıb. Kursu tam keçən iştirakçılara sertifikat verilir.

Qeyd edək ki, bu ilin iyulunda institutda Azərbaycanda tibb işçilərinin COVID-19 pandemiyası ilə əlaqədar bilik və bacarıqlarının təkmilləşdirilməsi məqsədilə “Proact training” layihəsi çərçivəsində “Təməl həyat dəstəyi” təlimləri keçirilib. Həmin təlimlərdə institutun 79 əməkdaşı və digər səhiyyə müəssisələrindən olan tibb işçiləri iştirak ediblər.