Görüş zamanı çıxış edən Mərkəzin icraçı direktoru Valeh Hüseynov bildirib ki, Müzəffər Ali Baş Komandanın rəhbərliyi ilə cəmi 44 gün ərzində Azərbaycanın uzun illərdir işğal altında qalan ərazilərini azad edən rəşadətli Azərbaycan Ordusu tarixi ədaləti bərpa etməklə öz möhtəşəm gücünü və hərbi qüdrətini bütün dünyaya nümayiş etdirdi. Artıq müstəqil dövlətimizin üçrəngli, ay-ulduzlu dövlət bayrağı respublikamızın bütün guşələrində olduğu kimi, Şuşada və işğaldan azad edilmiş digər torpaqlarımızda əzəmətlə dalğalanmaqdadır.

 

"Otuz ilə yaxın işğal altında olan torpaqlarımız şəhidlərimizin - əsgər və zabitlərimizin, qazilərimizin qanı və canı bahasına işğaldan azad edildi. Azərbaycan Ordusunun şanlı qələbəsi ilə başa çatan Vətən müharibəsi zamanı canlarını fəda edən oğullarımızın xatirəsi həmişə qəlbimizdə yaşayacaqdır", - deyə Valeh Hüseynov qeyd edib.

Daha sonra Vətən müharibəsində iştirak etmiş Mərkəzin laboratoriya şöbəsinin növbətçi həkimi Səbuhi Dadaşov və mühafizəçi Səhliyar Məmmədov Milli Hematologiya və Transfuziologiya Mərkəzinin "Təşəkkürnamə"ləri ilə təltif olunublar.

 

Xatırladaq ki, ölkə başçısının müvafiq sərəncamları ilə S.Dadaşov "Xocavəndin azad olunmasına görə medalı", S.Məmmədov isə "Cəsur döyüşçü" və "Füzulinin azad olunmasına görə medalı" ilə təltif edilmişdilər.