BMT-nin Baş katibi Antonio Quterreş Qlazqoda BMT-nin iqlim problemlərinə həsr edilmiş konfransına toplaşmış dünya liderlərinə müraciətlə xəbərdarlıq edib: “Biz özümüzə məzar qazırıq”.
Aztibb.az BMT-nin rəsmi saytına istinadla xəbər verir ki, Baş katibin sözlərinə görə, bəşəriyyətin qazıntı şəklində yanacaqdan asılılığı onu uçuruma, planetimizi isə təhlükəli dərəcədə istiləşmə səviyyəsinə yaxınlaşdırır.
Baş katib çıxışının əvvəlində deyib: “İqlim problemlərinə həsr edilmiş Paris sazişinin imzalandığı keçən 6 il meteroloji müşahidələr tarixində ən isti illər olub. Qazıntı şəklində yanacaq növlərindən asılılıq bəşəriyyəti uçuruma aparır”.
Onun sözlərinə görə, bu gün bəşəriyyət çox sərt bir seçim qarşısındadır: ya bu proses dayandırılacaq, ya da böhran planetdə həyata son qoyacaq. BMT rəhbəri deyib: “Bioloji müxtəlifliyə ziyan vurmağımız yetər, karbon tullantıları ilə özümüzü məhv etməyimiz yetər, təbiətə zibilxana kimi münasibət bəsləməyimiz yetər, yandırmaq, qazmaq yetər. Biz özümüzə məzar qazırıq”.
“İndi həqiqət anıdır. Biz böhran nöqtəsinə sürətlə yaxınlaşırıq, bu həddi keçəndən sonra qlobal istiləşmə prosesləri daha da sürətlənəcək”, - deyən Quterreş tullantısız, iqlim dəyişmələrinə davamlı iqtisadiyyata sərmayə qoymağa çağırıb. Quterreş əmindir ki, bu cür investisiyalar davamlı artıma, yeni iş yerləri açılmasına və yeni imkanlar üzə çıxmasına şərait yaradacaq.
Temperatur artımını 1,5 dərəcə səviyyəsində saxlamaq üçün çalışmağı tövsiyə edən Baş katib bu məsələdə “Böyük yeddilik” ölkələrinin üzərinə xüsusi məsuliyyət düşdüyünü vurğulayıb, çünki tullantıların təqribən 80 faizi həmin ölkələrin payına düşür. Baş katib iqtisadiyyatın karbonsuzlaşdırılmasını sürətləndirmək və kömürdən imtina etmək üçün inkişaf etmiş və inkişaf etməkdə olan ölkələri müvafiq koalisiyalar yaratmağa çağırıb.
Xatırladaq ki, Qlazqoda keçirilən konfransda Azərbaycanı ekologiya və təbii sərvətlər naziri Muxtar Babayevin başçılıq etdiyi nümayəndə heyəti təmsil edir.