Bu gün Azərbaycan Tibb Universiteti (ATU) ilə Türkiyənin 5 universiteti arasında əməkdaşlığa dair saziş imzalanıb.

 

Bu münasibətlə təşkil olunmuş tədbirdə ATU-nun rektoru, professor Gəray Gəraybəyli qonaqlara ali məktəbin yaranma tarixi, fəaliyyət istiqamətləri barədə məlumat verib. Bildirib ki, son illər aparılan islahatlar ATU-da tədris prosesinin keyfiyyətinin artırılmasına, həmçinin təhsilin beynəlxalq standartlara uyğunlaşdırılmasına xidmət edib. Bu isə, ATU-da daha çox əcnəbi tələbənin təhsil almasına zəmin yaradıb. Hazırda 2 mindən çox xarici tələbəsi olan universitet bu göstərici üzrə respublikamızın ali təhsil müəssisələri arasında ilk yerdədir.

 

Professor G.Gəraybəyli ATU-nun beynəlxalq əlaqələri arasında Türkiyənin ali məktəbləri ilə münasibətlərin xüsusi yer tutduğunu vurğulayıb. Rektor əminliklə bildirib ki, imzalanacaq yeni əməkdaşlıq protokolları bu münasibətlərin daha da güclənməsinə, ortaq uğurlu layihələrin ortaya qoyulmasına şərait yaradacaq.

 

Daha sonra Sağlık Bilimleri Universitetinin rektoru, prof. Cevdet Erdöl, Kütahya Dumlupinar Universitetinin rektoru, prof. Kazım Uysal, Bilecik Şeyh Edebali Universitetinin rektoru, prof. Şükrü Beydemir, Çankırı Karatekin Universitetinin rektoru, prof. Harun Çiftçi və Bolu Abant İzzet Baysal rektoru, prof. Mustafa Alişarlı çıxış edərək təmsil etdikləri ali təhsil müəssisələri barədə məlumat veriblər. Türkiyəli qonaqlar Azərbaycan xalqını böyük qələbənin ildönümü, Zəfər Günü münasibətilə təbrik ediblər.

 

Sonda ATU ilə Türkiyənin adları qeyd olunan beş universiteti arasında əməkdaşlığa dair saziş imzalanıb.