Ümumdünya Səhiyyə Təşkilatı (ÜST) karantindən sonra ölkələr arasında sərhədlərin açılmasını dəstəkləyir, eyni zamanda, fəlakətli vəziyyətə yol verilməməsi məqsədilə ehtiyat tədbirlərinə riayət olunmasını vacib hesab edir.

Aztibb.az RİA Novosti saytına istinadla xəbər verir ki, bu fikri ÜST-nin Baş direktoru Tedros Adhanom Qebreyesus brifinqdə söyləyib. O, bildirib: “Biz uşaqların məktəbə getməsini, insanların isə iş yerlərində olmasını görmək istəyirik. Lakin biz bütün bunların təhlükəsiz şəraitdə baş verdiyini görmək istəyirik. Ölkələr virusa nə qədər çox nəzarət edərsə, sərhədlər bir o qədər çox açıla bilər. Nəzarətsiz açılış fəlakətin “reseptidir”.

ÜST rəhbərinin sözlərinə görə, dövlətlər normal həyata qayıtmazdan əvvəl azı dörd mühüm addımı atmalıdır. Belə ki, virusun böyük sayda insan qrupları arasında yayılması məhdudlaşdırılmalıdır. Bu cür yoluxma kütləvi tədbirlərdə, o cümlədən gecə klublarında, stadionlarda, böyük dini yığıncaqlarda qeydə alınır. İkincisi, ölüm sayının azaldılması üçün virusa yoluxmaq baxımından daha çox həssas olanları qorumaq lazımdır. Üçüncüsü, hər kəs cəmiyyətdə təhlükəsizliyin təmin edilməsinə töhfə verməlidir: maska taxmalı, məsafə saxlamalı və əllərini yumalıdır. Dördüncüsü, hökumət orqanları xəstələrin aşkarlanması, təcrid edilməsi, test aparılması və müalicəsi, habelə təmasda olduğu şəxslərin müəyyənləşdirilməsində tədbir görməlidir.