Mərkəzi Gömrük Hospitalının Təcili yardım şöbəsinə yeni rəis təyin edilib
27.10.2021 17:15
Mərkəzi Gömrük Hospitalının təcili yardım həkimi hospitalın Təcili yardım şöbəsinin rəisi təyin edilib.
 
Aztibb.az xəbər verir ki, Nərgiz Kərimova 2009-cu ildən 2021-ci ilin 26 oktyabr tarixinə qədər Mərkəzi Gömrük Hospitalında təcili yardım həkimi kimi çalışıb. 
 
N.Kərimova Mərkəzi Gömrük Hospitalının Təcili yardım şöbəsində reanimasiya və stabilləşdirmə tələb edən ağır xəstələrin təcili qəbulunu, diaqnostik müayinələrin aparılmasını, kardiovaskulyar, pulmonar, mədə-bağırsaq, kranioserebral və endokrinoloji xəstəlikləri olan xəstələrin vəziyyətinin dəyərləndirilməsini, pandemiyası dövründə hospitala daxil olan COVID-19 xəstələrin qəbulunu həyata keçirib.
 
N.Kərimova 1987-1993-cu illərdə Azərbaycan Tibb Universitetinin Tibbi profilaktika fakültəsində təhsil alıb. O, 1993-1994-cü illərdə Azərbaycan Tibb Universitetində həkim-terapevt ixtisası üzrə internatura keçib. Əmək fəaliyyətinə 1994-cü ildə Mərkəzi Hövzə Xəstəxanasında başlayaraq 2002-ci ilə qədər burada təcili yardım həkimi kimi çalışıb.
 
2002-2003-cü illərdə Səudiyyə Ərəbistan Krallığının Əl-Baha şəhərində Al Baha İlk Tibbi Yardım Mərkəzində şöbə müdiri, 2003-2006 cü ildə Al Baha şəhəri Əl Dəfir Mərkəzi Təcili Yardım Hospitalında şöbə müdiri, 2006 Mina şəhəri S.Ə.Krallığı Mina mərkəzi xəstəxanasida həkim kimi çalışıb. O, 2005-ci ildə Əl Baha regionu üzrə ilin ən yaxşı həkimi seçilib. N.Kərimova 2006-2009-cu illərdə müxtəlif özəl tibb müəssisələrində həkim ekspert kimi çalışıb.