İsrailli professor Tədris Cərrahiyyə Klinikasında mühazirə deyib - FOTO
27.10.2021 14:28
İsrail Dövlət Soroka Universitetinin şöbə rəhbəri, professor Mickey Gideon Azərbaycan Tibb Universitetinin (ATU) Tədris Cərrahiyyə Klinikasının qonağı olub.
 
Aztibb.az xəbər verir ki, görüş zamanı klinikanın direktoru, professor Surxay Hadıyev rəhbərlik etdiyi tibb müəssisəsi, həmçinin ATU-nun tarixi, müasir dövrdəki fəaliyyəti və əldə olunan nailiyyətlər haqqında geniş məlumat verib. Həmçinin, ötən il Azərbaycanın işğal altında olan torpaqlarını azad etmək uğrunda savaşında, eləcə də koronavirusla mübarizədə ATU-nun məzunları və həkimlərinin nümunə olduqlarını diqqətə çatdırıb. Qeyd edib ki, ölkədə COVID-19-la mübarizəyə qatılan ilk klinikalardan biri də Tədris Cərrahiyyə Klinikası olmuşdur. 
 
Professor S.Hadıyev 16 əməliyyat bloku, 14 şöbədən ibarət olan Tədris Cərrahiyyə Klinikasında bütün növ əməliyyatların icra edildiyini, müəssisənin son model texnoloji avadanlıqlarla təchiz olunduğunu, bunun da tələbələrin klinik məşğələlərini yüksək səviyyədə keçməsinə imkan verdiyini bildirib.
 
İsrail Dövlət Soroka Universitetinin Pediatrik Neyrocərrahiyyə şöbəsinin rəhbəri Prof. Mickey Gideon ATU Tədris Cərrahiyyə Klinikasında yaradılan şəraitlə yaxından tanış olub.
 
Qeyd edək ki, xarici mütəxəssis Heydər Əliyev Fondunun dəvəti ilə Bakıda səfərdədir. Səfər çərçivəsində professor M.Gideon Azərbaycan Tibb Universitetinin müəllim, rezident və tələbələri qarşısında “Neyrocərrahiyyədə müasir texnologiyalar” mövzusunda mühazirə ilə çıxış edib.