Son illər ölkəmizdə aparılan çoxşaxəli islahatların tərkib hissəsi olaraq təhsil sahəsində də müxtəlif tədbirlər həyata keçirilir. Bu baxımdan, dissertasiya işlərinin müdafiəsi üzrə də müəyyən tədbirlər görülüb. Belə ki, Azərbaycan Respublikasının Prezidenti yanında Ali Attestasiya Komissiyasının yeni əsasnaməsi təsdiq olunub, şuraların tərkibi yenilənib və müxtəlif istiqamətlər üzrə dissertasiya şuraları yaradılıb.
Aztibb.az xəbər verir ki, bu yeniliklər barədə əczaçılıq üzrə ixtisaslaşmış şuranın elmi katibi, dosent Sənəm Əliyeva məlumat verib. Onun dediyinə görə, ölkəmizdə son 20 ildə bu sahədə ixtisaslaşmış dissertasiya şurası mövcud olmayıb: “Hazırda Ali Attestasiya Komissiyası tərəfindən əczaçılıq ixtisası üzrə 2 ixtisaslaşma: “Əczaçılıq kimyası, farmakoqnoziya” və “Dərmanların alınma texnologiyası, əczaçılıq işinin təşkili” ixtisasları üzrə birdəfəlik dissertasiya şurasının yaradılması haqqında sərəncam verilib. Bu da Əczaçılıq fakültəsi üçün çox önəmlidir. Belə ki, gənc mütəxəssislərin hazırladığı dissertasiya işlərinin müdafiəsi nisbətən asanlaşır, eyni zamanda onların müasir səviyyədə, yüksək tələbkarlıq şəraitində müdafiəsi üçün şərait yaranır. Respublikamızın əczaçılıq sahəsində tanınmış mütəxəssisləri, o cümlədən bütün elmlər doktorları dissertasiya şurasının tərkibində iştirak edirlər. Dissertasiya şurasına professor Yusif Kərimov rəhbərlik edir. Şuranın üzvlərindən professorlar Eldar Qarayev, Cavanşir İsayev, Məhbubə Vəliyeva və başqalarını göstərmək olar. Bununla yanaşı, hər ixtisas üzrə 5 nəfər mütəxəssisin də iştirakı tələb olunur”.
“Dərmanların alınma texnologiyası və əczaçılıq işinin təşkili” ixtisası üzrə kadr çatışmazlığından danışan S.Əliyeva bildirib ki, bu problem qonşu dövlətlərin köməyi ilə aradan qaldırılıb: “Rusiya Federasiyası Pyatiqorsk Əczaçılıq İnstitutundan professorlar E.F.Stepanova və Ayro Andreyevanın, həmçinin Gürcüstan Respublikasından professorlar Kompantseve və Bakuridze kimi mütəxəsislərin bu şuraya cəlb olunması nəticəsində dissertasiya şurası yaradıldı. Sevindirici haldır ki, oktyabrın 14-ü və 15-i tarixlərində fakültəmizin 2 əməkdaşı - Farmakoqnoziya kafedrasının baş müəllimi Aytən Şükürova, eləcə də Ümumi və toksikoloji kimya kafedrasının baş müəllimi Sara Paşayeva əczaçılıq üzrə fəlsəfə doktorluğu dissertasiya işini müvəffəqiyyətlə müdafiə ediblər. Hazırda onların sənədlərinin tərtibi və Ali Attestasiya Komissyasına təqdim olunması üzrə işlər aparılır”.
