Hər il oktyabrın 24-ü Ümumdünya Poliomielit Günü kimi qeyd olunur. Bu gün ilə əlaqədar təşkil olunan tədbirlərin məqsədi poliomielit xəstəliyinə və xəstəlik sonrası problemlərə diqqəti cəlb etmək və vaxtında görülməli olan profilaktik tədbirlərin vacibliyini dünya ictimaiyyətinə çatdırmaqdır.

 

Aztibb.az xəbər verir ki, poliomielit sinir sistemini zədələyə, əzələlərin iflicinə gətirib çıxara və ölümlə nəticələnə bilən yoluxucu xəstəlikdir. İnfeksiya mənbəyi xəstə insan və sağlam virus daşıyıcısıdır. Xəstəliyə yoluxma fekal-oral (çirkli əllər, yoluxmuş qida, əşyalar, oyuncaqlar, çirkab sular və s.) və ya hava-damcı yolu ilə, əsasən, ağız boşluğuna virusun düşməsi ilə baş verir.

 

Azərbaycan Avropanın digər ölkələri ilə yanaşı, 2002-ci ildən poliomielitdən azad ərazi sayılır. Lakin bütün dünyada poliomielit virusu ləğv edilməyənə qədər bu xəstəliyə yoluxma təhlükəsi qalır. Poliomielitin yeganə profilaktika yolu peyvənddir. Peyvənd nəticəsində uşaqlarda poliomielitə qarşı immunitet (xəstəliyə tutulmama qabiliyyəti) yaranır. Azərbaycanda poliomielitə qarşı peyvənd bütün uşaqlara dövlət tibb müəssisələrində dövlət hesabına edilir.