Aztibb.az xəbər verir ki, Avropa İttifaqının maliyyə dəstəyi ilə 2020-ci ilin aprel ayında başlanan layihə çərçivəsində COVID-19-a yoluxmuş ağır xəstələrin müalicəsində istifadə olunan 1000-dən çox müxtəlif tibbi avadanlıq, tibb işçiləri üçün 10 minlərlə fərdi mühafizə vasitələri və 1 milyon tibbi əlcək ölkəyə təhvil verilib.

 

Bununla yanaşı, 3400 tibb işçisi və tibb sahəsində təhsil alan 1400 tələbə COVID-19-a qarşı mübarizənin müxtəlif aspektlərinə dair onlayn və üzbəüz təlimlərdə iştirak edib. Həmçinin 21 xəstəxana, 2 psixi sağlamlıq müəssisəsi və 5 ilkin səhiyyə müəssisəsində infeksiyanın profilaktikası və nəzarət, habelə COVID-19 xəstəliyinin idarəolunması üzrə qiymətləndirmələr aparılıb və tövsiyələr verilib.

 

2022-ci ilin aprel ayına qədər davam edəcək layihənin əsas məqsədi pandemiyaya qarşı mübarizədə Azərbaycana dəstək olmaq, eləcə də gələcəkdə baş verə biləcək pandemiyalara qarşı ölkənin dayanıqlı cavab potensialının formalaşdırılmasıdır.