Bu gün Azərbaycan Tibb Universitetinin II Mamalıq-ginekologiya kafedrasının müdiri, Əməkdar həkim, professor Hicran Bağırovanın 70 yaşı tamam olur.

Aztibb.az xəbər verir ki, Hicran Bağırova 1967-ci ildə N.Nərimanov adına Azərbaycan Dövlət Tibb İnstitutunun Müalicə-profilaktika fakültəsinə daxil olmuş və 1973-cü ildə institutu bitirmişdir. O, 1975-1977-ci illərdə Moskva şəhərində Ümumittifaq Onkologiya Elmi Mərkəzində kliniki ordinatura keçmişdir. 1977-ci ildən 1993-cü ilədək həmin Elmi Mərkəzin Ginekologiya şöbəsində baş laborant, həkim, kiçik elmi işçi vəzifələrində çalışmışdır. 1984-cü ildə namizədlik, 2000-ci ildə isə doktorluq dissertasiyalarını müdafiə etmişdir. 

H.Bağırovaya 1991-ci ildə SSRİ Elmlər Akademiyası tərəfindən "Ali dərəcəli həkim" adı verilmişdir. O, 1993-cü ildə Azərbaycan Tibb Universitetinin II Mamalıq-ginekologiya kafedrasında assistent, 1998-ci ildə dosent işləmiş, 2003-cü ildən indiyədək isə kafedra müdiri vəzifəsində çalışır.

Alim ATU-nun Böyük Elmi Şurasının, II Müalicə-profilaktika fakültəsinin Elmi Şurasının üzvüdür, Respublika Mama-ginekoloqlarının Elmi Cəmiyyətinin sədr müavinidir. Həmçinin, ATU-nun nəzdindəki Dissertasiya Şurasının üzvü, Azərbaycan Respublikası Səhiyyə Nazirliyi Elmi Tibbi Şuranın plenum üzvü, Alman-Azərbaycan Mama-ginekoloqlar Cəmiyyətinin sədridir.

O, Azərbaycan Respublikası Prezidentinin sərəncamı ilə 2008-ci ildə “Azərbaycan Respublikasının Əməkdar həkimi” fəxri adına layiq görülmüşdür.