TƏBİB-in məsul şəxsləri ilə UNICEF-in eksperti Kim Dikson və Azərbaycan nümayəndəliyinin əməkdaşları arasında görüş keçirilib.

 

Aztibb.az xəbər verir ki, görüş zamanı TƏBİB-in Tibbi xidmətlər departamentinin rəhbəri Firəngiz Əliyeva Azərbaycanda icra olunan neonatoloji tibbi xidmətlər barədə məlumat verib. O, bu sahədə xidmət səviyyəsinin yaxşılaşdırılması istiqamətində UNICEF-lə əməkdaşlığın vacibliyini vurğulayıb.

 

Daha sonra çıxış edən K.Dikson neonatoloji sahədə mövcud problemlərin aradan qaldırılması məqsədilə ilk olaraq uşaqların anadangəlmə və ya doğuşdan sonra yaranan xəstəliklərinin, psixoloji problemlərinin aşkar edilməsinin, eyni zamanda, həmin ailələrlə mütəmadi işlərin aparılmasının böyük əhəmiyyət kəsb etdiyini bildirib.

 

Məlumat üçün qeyd edək ki, Kim Dikson respublikanın doğuşayardım müəssisələrində neonatoloji tibbi xidmətin keyfiyyətinin yaxşılaşdırılması, həkim və orta tibb işçilərinin bilik və bacarıq səviyyələrinin təyin edilməsi, tibb müəssisələrində fəaliyyətin qiymətləndirilməsi məqsədilə TƏBİB-in təşəbbüsü ilə ölkəmizdə səfərdədir.