Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin sosial sifarişi əsasında “Əlilliyi olan şəxslərə diqqət və qayğının artırılması məqsədilə maarifləndirici nəşrlərin hazırlanması” layihəsinin icrasına başlanılıb. Layihə İnformasiya Təşəbbüslərinə Dəstək İctimai Birliyi tərəfindən həyata keçirilir.

İctimai birlikdən bildirilib ki, layihənin əsas məqsədi cəmiyyətin diqqətinin əlilliyi olan şəxslərin hüquqlarının müdafiəsinə, sosial problemlərinin həllinə, onların fiziki, əqli və intellektual potensiallarının üzə çıxarılmasına nail olmaq, məlumat və maarifləndirici xarakterli nəşrlərin hazırlanaraq əhali arasında geniş yayılmasını təşkil etməkdir.

Qeyd olunan məqsədlə əlilliyi olan şəxslərlə bağlı geniş təbliğat-təşviqat kampaniyası həyata keçiriləcək. Belə ki, əlilliyi olan şəxslərin hüquqları təşviq olunacaq, bununla bağlı informasiya mühiti inkişaf etdiriləcək. Layihə çərçivəsində əlilliyi olan şəxslərin hüquqları haqqında 3 mövzuda hər biri 1500 nüsxə olmaqla bukletlərin nəşri, əlilliyi olan şəxslərin hüquqlarının təşviqi məqsədilə 4 maarifləndirici videoçarxın hazırlanması da nəzərdə tutulub. Həmçinin əlilliyi olan istedadlı şəxslərin potensiallarının üzə çıxarılması və təbliğ olunması məqsədilə 2 videoreportaj və 3 məqalə hazırlanaraq ölkə mətbuatında yayımlanacaq.

Layihə çərçivəsində jurnalistlər və Jurnalistika fakültəsinin tələbələri üçün “Əlilliyin düzgün dərk edilməsi” mövzusunda treninqlər də keçiriləcək.