Səhiyyə Nazirliyi, Təhsil Nazirliyi, Ailə, Qadın və Uşaq Problemləri üzrə Dövlət Komitəsinin birgə əməkdaşlığı ilə təhsil müəssisələrində yeniyetmə və gənclərin sağlam həyat tərzi, reproduktiv sağlamlıq və ailə planlaşdırılmasına dair biliklərinin artırılması, təhlükəsiz cinsi davranış vərdişlərinin formalaşdırılması istiqamətində növbəti maarifləndirmə tədbiri keçirilib.

 

Aztibb.az xəbər verir ki, oktyabrın 11-də Ağdam Dövlət Sosial İqtisadi Kollecinin və Qazax Dövlət Sosial-İqtisadi Kollecinin müəllim və tələbələri üçün “Reproduktiv sağlamlıq və ailə planlaşdırılması” mövzusunda onlayn tədbir təşkil olunub.

 

Səhiyyə Nazirliyinin İctimai Səhiyyə və İslahatlar Mərkəzinin nümayəndəsi, həkim Zümrüd Kazımova geniş təqdimatla çıxış edərək, reproduktiv sağlamlığın əsas amillərindən, zərərli vərdişlərdən uzaq olmağın və fərdi gigiyena qaydalarına riayət etməyin vacibliyindən söz açıb. O, gənclərə ailə planlaşdırılması və müasir kontraseptiv üsullar barədə ətraflı məlumat verib, iştirakçıları maraqlandıran sualları cavablandırıb.

 

Tədbirdə Ailə, Qadın və Uşaq Problemləri üzrə Dövlət Komitəsinin Ailə Problemləri şöbəsinin müdir müavini Kamila Əliyeva çıxış edərək gənclərin həyatında reproduktiv sağlamlıqla bağlı yaşanan problemlərdən, ailə planlaşdırılmasının önəmindən, eləcə də erkən nikahların fəsadlarından bəhs edib.