Sumqayıt Təcili Tibbi Yardım Xəstəxanasının həkimi Xasay Bayramov koronavirusa yoluxub. Aldığı müalicələrə baxmayaraq onun səhhətində əsaslı irəliləyiş olmayıb, ötən gecədən etibarən isə vəziyyəti daha da ağırlaşıb. Xəstədə artıq ağciyər çatışmazlığı müşahidə olunur. Kəskin tənəffüs problemi o həddə çatıb ki, süni tənəffüs aparatının effekti qalmayıb.

Azərbaycanda müxtəlif sahələr üzrə fəaliyyət göstərən bir qrup həkim həmkarlarına dəstək olmaq məqsədilə sosial şəbəkələr vasitəsilə vitse-prezident, ölkənin birinci xanımı Mehriban Əliyevaya müraciət ediblər. Tibb işçiləri birinci xanımdan həkimin EKMO cihazına qoşulmasına yardım edilməsini xahiş ediblər.