Qış aylarında Böyük Britaniyada qripə yoluxma nəticəsində ölənlərin sayı 60 min nəfərə çata bilər. Belə ki, hakimiyyətin koronavirus pandemiyasına qarşı mübarizə ilə bağlı tətbiq etdikləri karantin tədbirləri nəticəsində ölkə əhalisinin kəskin respirator-virus xəstəliklərinə qarşı immuniteti zəifləyib.

Aztibb.az “The Sun” qəzetinə istinadla xəbər verir ki, Böyük Britaniyanın səhiyyə nümayəndələrinin sözlərinə görə, ölkədə qrip epidemiyası mövsümü ərzində ölüm hallarının sayı 50 il əvvəlki rekordu yeniləyə bilər.

“Ötən il koronavirus məhdudiyyətləri səbəbindən qripə yoluxanların sayı elə də çox olmadı. Buna görə də, insanların təbii immuniteti əvvəlki kimi güclü deyil. Biz qış mövsümündə qripin yayılmasını diqqətlə izləyəcəyik. Qripə yoluxma halları adi illərdən fərqli olaraq daha çox ola bilər ki, bu da ictimai səhiyyə üçün ciddi problemə çevriləcək”, – deyə İngiltərənin baş həkiminin müavini Conatan Van-Tam bildirib.

Böyük Britaniyanın səhiyyə orqanları bu il qrip virusu səbəbindən ölüm hallarının sayının 1968-1970-ci illərdə baş vermiş Honkonq qripi pandemiyasından sonra ən yüksək həddə çata biləcəyindən ehtiyatlanır.

Qeyd edək ki, hər il Böyük Britaniyada qrip virusu səbəbindən orta hesabla 11 min insan həyatını itirir.