İranın kubalı və avstraliyalı mütəxəssislər ilə birlikdə istehsal etdiyi “Pastocovac” peyvəndi koronavirusa qarşı əvvəl istehsal olunan peyvəndlərdən daha təsirlidir.

Aztibb.az xəbər verir ki, bu sözləri İranın Dərman və Tibbi Ləvazimatlara Nəzarət İdarəsinin rəhbəri Məhəmmədrza Şanesaz deyib. O, bildirib ki, bu peyvəndi 12-18 yaşlı uşaqlara vurmaq olar. İlkin mərhələdə 6 milyon doza “Pastocovac” peyvəndi istehsal edilib və Səhiyyə Nazirliyinə təhvil verilib. Gələn ay bu peyvənddən 10 milyon doza istehsal ediləcək.

İranın Səhiyyə Nazirliyinin bu gün verdiyi aşıqlamaya əsasən son 24 saat ərzində ölkə ərazisində 9 min 897 nəfərin virusa yoluxması, 185 nəfərin isə bu xəstəlikdən ölməsi faktı qeydə alınıb. Bununla da İranda virusa yoluxanların ümumi sayı 5 milyon 683 min 980 nəfərə, yoluxaraq ölənlərin sayı isə 122 min 197-yə çatıb.

Müxtəlif xəstəxanalarda müalicə alan 5 min 451 xəstənin vəziyyəti ağır olaraq qalır. Eyni zamanda, 5 milyon 186 min 96 nəfər sağalaraq evə buraxılıb.

Qeyd edək ki, İranda koronavirusun yayılması və ölüm hallarında azalma davam edir. Ölkədə 60 milyona yaxın insana peyvənd vurulub və bu proses davam edir.