Aztibb.az xəbər verir ki, öncə ATU-nun Tədris Terapevtik Klinikasının direktoru, professor Surxay Musayev çıxış edərək təlimdə iştirak edənləri salamladı. O, keçirilən təlimin əhəmiyyətinə diqqət çəkərək, səhiyyəmizdə ana südü, körpələrin qidalandırılması məsələsinə hər zaman önəm verildiyini vurğuladı. Professor ana südü ilə qidalandırmanın alternativi olmadığını və təlimçilərin bu məsələ ilə bağlı vacib və maraqlı məlumatlar verəcəklərinə əminliyini ifadə etdi.

 

UNICEF-in Azərbaycan nümayəndəliyinin “Sağlam qidalanma” proqramı üzrə yerli milli məruzəçisi Vəfa Ağayeva öz çıxışında yenidoğulmuş uşaqların qidalanmasında ana südünün rolundan geniş söhbət açdı. Bildirdi ki, ana südü olduğu halda, körpələrin onun alternativi kimi reklam edilən qatqılarla qidalandırılması yolverilməzdi:

 

“Aparılan araşdırmalar göstərir ki, ana südü ilə qidalananlarda immunitet yüksək olur və xəstələnmə hallarına digərləri ilə müqayisədə daha az rast gəlinir. Bu uşaqlarla bağlı həkimə müraciətlərin sayı kəskin dərəcədə az olur. Təbii yolla qidalanmayan körpələr arasında isə 6 ay ərzində ishaldan dünyasını dəyişənlər 25 dəfə çoxdur”.

 

Körpələri ana südü ilə qidalandırmağın anaların sağlamlığına da müsbət təsir göstərdiyin qeyd edən məruzəçi, misal olaraq, qarında piy vəzinin əriməsini, döş xərçənginə az rast gəlindiyini vurğuladı.

 

Ana südü ilə qidalanmada 10 addıma riayət etməyin vacibliyinə diqqət çəkən V.Ağayeva əksər doğum evlərində buna əməl olunmadığından təəssüfləndiyini bildirdi: “Tibb müəssisələrinin müvafiq siyasəti olmalı, tibbi heyətin bilik və bacarıqları tələblərə cavab verməli, antenatal qayğı, doğuşdan dərhal sonra qayğı, əmizdirmədə analara dəstək, süni qidalardan uzaq olma, palatada ananın köpə ilə birgə qalmasına şərait yaradılması təmin edilməli, tələbatlara cavab verən qidalandırma olmalı, əmzikli şüşə və əmziklərin ziyanı, evə yazılma zamanı nəyə əməl olunması barədə doğum evlərinin tibbi heyəti tərəfindən analara ətraflı məlumat verilməlidir".

 

V.Ağayeva əyalətlərdə vəziyyətin daha pis olduğunu qeyd etdi, Körpə Dostu klinikalarının olması üçün mütəxəssislər arasında maarifləmə işinin aparlmasına ehtiyac duyulduğunu dilə gətirdi.

 

Digər təlimçi, ATU-nun Tədris Terapevtik Klinikasının pediatr-neanotoloqu Nurəngiz Hacıyeva Körpə Dostu Klinikası strategiyası üzərində UNICEF-in Səhiyyə Nazirliyi, TƏBİB ilə birgə işləməsinin gələcəkdə müsbət nəticələr verəcəyinə inandığını bildirdi. Qeyd etdi ki, Körpə Dostu Kliniksı anlayışı 1990-cı illərdə dövriyyədə olub:

 

“Həkimlər və neanotoloqlar klinikalara daxil olaraq onların bu strategiyaya cavab verib-verməməsini qiymətləndiriblər. Qiymətləndirmə isə çox sadədir: klinikada heç bir əmzik, şüşə butulka, süni vasitə, süni qida olmamalıdır. Ana südü ilə qidalanmaya əks göstəriş siyahısı son illər olduqca qısalıb. Yalnız ana südünə əks göstəriş qalaktozema və aktiv fəaliyyətdə olan QİÇS xəstəliyidir. Əgər ana fövqəladə bir vəziyyətə düşübsə, o, QİÇS xəstəsi olsa belə, uşağın həyatı süddən asılıdırsa, onu südlə bəsləyə bilər. Odur ki, ana südü qəbul etmək hər bir uşağın haqqıdır. Biz bunun davamlı təminatını dəstəkləməliyik”.

 

Qeyd edək ki, oktyabrın 8-dək davam edəcək təlimlər təkcə ATU ilə məhdudlaşmayacaq. N.Hacıyevanın bildirdiyinə görə, təbliğat işlərinin genişləndirilməsi üçün onlar K.Fərəcov adına Elmi-Tədqiqat Pediatriya İnstitutunda, Sumqayıt Beynəlxalq Xəstəxanasında, Abşeron Mərkəzi Xəstəxanasında və bir neçə qadın məsləhətxanalarında olacaq, mütəxəssislərə ana südü ilə qidalanmaya doğru 10 addım barədə ətraflı məlumat verəcəklər.