Azərbaycan tibb elminin görkəmli nümayəndəsi, Əməkdar elm xadimi, Dövlət mükafatı laureatı, professor Tamerlan Əliyevin anadan olmasından 100 il ötür. Bu münasibətlə Azərbaycan Tibb Universitetinin (ATU) Tədris Terapevtik Klinikasının Nevrologiya şöbəsində Tamerlan Əziz oğlu Əliyevin barelyefinin açılışı olub.

 

Bu barədə Aztibb.az-a ATU-dan məlumat verilib.

 

Bildirilib ki, açılış mərasimində universitetin rektoru, professor Gəray Gəraybəyli çıxış edərək Tamerlan Əliyevin Azərbaycan tibb tarixi salnaməsinə qızıl hərflərlə yazılmış xidmətləri, gənc həkimlərimiz üçün örnək olan çoxşaxəli fəaliyyəti haqqında danışıb. O, Tamerlan Əliyevi Azərbaycanın tibb elminin və səhiyyəsinin öndər nümayəndəsi adlandırıb: “Yüksək insani keyfiyyətləri ilə seçilən professor Tamerlan Əliyev Azərbaycan üçün yüksəkixtisaslı kadrların yetişdirilməsi işinə misilsiz töhfələr verib. Fəaliyyətinin müəyyən dövrü Tibb Universiteti ilə bağlı olan görkəmli alimin 100 illik yubileyi bizim ali məktəbdə də geniş qeyd olunur”.

 

Rektor qeyd edib ki, artıq ATU-da professor T.Əliyevin 100 illik yubileyi ilə bağlı silsilə tədbirlərə start verib. Belə ki, ötən həftə universitetdə Gənc alimlər və tələbələrin konfransı keçirilib. Sabah isə ATU-da dünyanın 13 aparıcı elmi müəssisəsi və ali məktəbinin nümayəndələrinin iştirakı ilə beynəlxalq konqres işə başlayacaq. Üç gün davam edəcək tədbirdə Fransa, İngiltərə, Türkiyə, Kanada, ABŞ və Türkiyənin ali məktəblərindən qonaqlar iştirak edəcək.

 

Daha sonra görkəmli alim T.Əliyevin qızı Tamfira Əliyeva çıxış edərək ATU rəhbərliyinə atasının yaradıcılığına göstərdiyi diqqətə görə təşəkkürünü bildirib. Atası ilə bağlı xatirələrini bölüşən Tamfira Əliyeva onun iş həyatında Tibb Universitetində olduğu illərin mühüm rol oynadığını bildirib.

 

Sonra barelyefin açılışı olub.

 

Mərasimdə Tamerlan Əliyevin ailə üzvləri və yaxınları ilə yanaşı, ATU-nun nümayəndələri də iştirak ediblər.