Azərbaycanda xüsusi təyinatlı qida məhsullarının yeni siyahısı müəyyən edilir.

Aztibb.az-ın məlumatına görə, bu, yeni hazırlanan "Qida təhlükəsizliyi haqqında" qanun layihəsinin ilkin versiyasında əksini tapıb.

Qanun layihəsinin 12-ci maddəsinə əsasən, uşaq orqanizminin fizioloji tələbatlarına cavab verən və üç yaşına qədər uşaqların qidalanması üçün nəzərdə tutulmuş qida məhsulları; gündəlik qida rasionunun tam dəyişdirilməsini təmin edən, bədən kütləsinin azaldılması baxımından enerjinin məhdudlaşdırılması üçün istifadə edilən pəhriz qida məhsulları; insan orqanizmində zərərli amillərin xroniki təsiri ilə şərtlənən pozuntuların qarşısının alınması məqsədi ilə xüsusi qida rasionlarında istifadə olunan müalicəvi-profilaktik qida məhsulları xüsusi təyinatlı qida məhsullarına aid edilir.

Xüsusi təyinatlı qida məhsulları qida təhlükəsizliyinə dair qanunvericiliklə müəyyən edilmiş tələblərə cavab verməli və müvafiq icra hakimiyyəti orqanının müəyyən etdiyi orqan (qurum) tərəfindən qeydiyyata alındıqdan sonra dövriyyəyə buraxılmalıdır.

Qeyd edək ki, qanun layihəsinin Milli Məclisin payız sessiyası çərçivəsində müzakirəyə çıxarılması nəzərdə tutulur.