Hər il oktyabr ayının ilk bazar ertəsi bütün dünyada Beynəlxalq Həkimlər Günü kimi qeyd edilir. Bu günün başlıca mahiyyəti dünya həkimlərinin həmrəyliyidir.

Aztibb.az xəbər verir ki, hər il həmin təşkilatın minlərlə həkimi müxtəlif ölkələrdə, o cümlədən qaynar nöqtələrdə fövqəladə vəziyyətlərlə üzləşənlərə heç bir fərq və ayrı-seçkilik qoymadan tibbi kömək göstərirlər. Həmin təşkilatın könüllüləri QİÇS və narkomaniya ilə mübarizədə profilaktik və maarifçilik işi aparırlar. Hər il "Sərhədlərsiz həkimlər" təşkilatından minlərlə həkim müxtəlif ölkələrdə ehtiyacı olanlara kömək edirlər.

Bu həssas və xeyirxah peşə sahiblərinin kabinetdə və ya səhra şəraitində işləməsi onların xidmətlərini azaltmır, çünki onlar bütün hallarda cansağlığının qoruyucularıdır.

Həkimlik dünyanın ən qədim, ən humanist və çətin peşələrindən biridir. Yarandığı gündən bu peşəyə çox böyük hörmət və qiymət verilib. Hazırda bu sahədə çalışanlar indiyə qədər fəaliyyət göstərən həkimlərin bilik və bacarıqları əsasında əldə olunmuş uğurlardan istifadə edirlər.

COVID-19 pandemiyası dövründə bütün ölkələrdə, o cümlədən Azərbaycanda həkimlər, ümumiyyətlə, bütün səhiyyə işçiləri fövqəladə qəhrəmanlıq göstərdilər. Gecəsini gündüzünə qatan tibb işçilərimiz hər bir xəstənin həyata qayıtması üçün var gücləri ilə çalışdı­lar. Məhz bu səbəbdən onların əməyi yüksək dəyərləndirildi. Prezidentin sərəncamı ilə tibb işçilərinin sosial müdafiəsi gücləndirildi. Xatırladaq ki, cənab Prezident bu barədə demişdir: “Əlbəttə ki, bu mübarizədə əsas yük həkimlərin üzərinə düşür. Mən fürsətdən istifadə edərək Azərbaycan həkimlərinə təşəkkürümü bildirmək istəyirəm. Biz onların maddi təminatının yaxşılaşdı­rılması üçün əlavə tədbirlər görmüşük. Bildiyiniz kimi, koronavirus xəstələrinə xidmət göstərən həkimlərin maaşı 3, 4, 5 misli məbləğində artırılıb. Bu, dövlət tərəfindən həkimlərə göstərilən diqqətin təzahürüdür”. Həmçinin Heydər Əliyev Fondu və Heydər Əliyev Mərkəzinin dəstəyi ilə Yeni Çağrı Mərkəzi yaradıl­dı. Mərkəzdə koronaviruslu xəstələrin müalicəsinə cəlb olunmuş həkimlərə və tibb personalına psixoloji dəstək göstərilməsinə başlandı.

Həkimlər və səhiyyə işçiləri hər il öz peşə bayramları günü ilə əlaqədar olaraq müxtəlif maarifçilik tədbirləri - seminarlar, tibb peşəsi ilə əlaqədar mühazirələr, sərgi və təqdimatlar keçirirlər.

Peşə bayramınız mübarək!