Ürək-damar xəstəlikləri bütün dünyada, eləcə də ölkəmizdə ən çox ölümə və əlilliyə səbəb olan xəstəliklər sırasındadır. Azərbaycanda hər il 40 minə yaxın insan qan dövranı sistemi xəstəlikləri nəticəsində həyatını itirir. Koronavirus pandemiyasına bağlı olaraq insanların aktiv həyat tərzindən uzaq olması da ürək-damar xəstəliklərinin sayının artmasında rol oynayır. 

Aztibb.az xəbər verir ki, Dövlət Gömrük Komitəsi Tibbi Xidmət İdarəsinin Elmi Təcrübi və Tədris Mərkəzinin rəisi, Mərkəzi Gömrük Hospitalının ürək-damar cərrahı, t.e.d. Rəşad Mahmudov 29 sentyabr - Ümumdünya Ürək Günü ilə bağlı təbrik çıxışında bu barədə məlumat verib. 

"Tibbin bu sahəsinin inkişafı ölkəmizdə həmin xəstəliklərlə mübarizədə yeni imkanlar açıb. Bununla yanaşı, insanlar gündəlik həyat tərzi ilə bu kimi problemlərin yaranması riskindən uzaq ola bilərlər. Bunun üçün gündəlik idmanla məşğul olmaq, sağlam qidalanma, siqaret və alkohol kimi zərərli vərdişlərdən imtina etmək, o cümlədən sevgi ilə gülümsəyə bilmək əhəmiyyətlidir. Hər birinizə ürək xəstəlikləri və onların fəsadlarından uzaq bir həyat arzu edirəm" - deyə R.Mahmudov müraciətdə bildirib.