Gömrük əməkdaşları üçün ilkin tibbi yardımın göstərilməsinə dair təlimlər keçiriləcək
21.09.2021 15:57

Gömrük-sərhəd buraxılış məntəqələrində xidmət aparan baş müfəttişlər üçün "İlk tibbi yardımın göstərilməsi" mövzusunda davamlı olaraq təlimlər keçiriləcək.

 

Aztibb.az-ın məlumatına görə, təlimləri Dövlət Gömrük Komitəsinin Tibbi Xidmət İdarəsi nəzdində fəaliyyət göstərən Sanitar-Karantin Xidmətinin təlimçiləri aparacaq.

 

Bu məqsədlə Sanitar-Karantin Xidmətinin əməkdaşları İxtiyar Muxtarov və Müşviq Qəhrəmanov xüsusi təlim və hazırlıq kursunu bitirərək, mütəxəssis kimi qiymətləndiriliblər.

 

"Updotade-in-medicine" şirkətinin və Səhiyyə Nazirliyi İctimai Səhiyyə və İslahatlar Mərkəzinin birgə təşkilatçılığı ilə təşkil olunan həmin təlim nəzəri və praktiki mərhələlərdən ibarət olubBununla da Sanitar-Karantin Xidmətinin əməkdaşları gömrük-sərhəd buraxılış məntəqələrində xidmət aparan baş müfəttişlərə sertifikatlaşdırlımış ilk tibbi yardım təlimini keçmək hüququnu qazanıblar.

 

İlkin mərhələdə Sanitar-Karantin Xidmətinin təlimçiləri artıq 20-yə yaxın baş müfəttişə təlim keçiblər. Müxtəlif regionlardan cəlb olunan gömrük əməkdaşları ilk tibbi yardımın göstərilməsinə dair zəruri bilik, vərdiş və bacarıqlara yiyələniblər. Bu təlimdə Sanitar-Karantin Xidmətinin rəis müavini Namiq Məmmədov və Gömrük Akademiyasının nümayəndələri də müşahidəçi kimi iştirak ediblər.

 

Təlimlərin keçirilməsində əsas məqsəd hadisə yerinə peşəkar həkim briqadası gələnədək xəstə və ya yaralılara ilkin tibbi yardımın göstərilməsi bacarıqlarının öyrənilməsidir.