AMEA-nın vitse-prezidenti, Molekulyar Biologiya və Biotexnologiyalar İnstitutunun (MBBİ) baş direktoru, akademik İradə Hüseynova Azərbaycan Respublikası Qida Təhlükəsizliyi Agentliyinin (AQTA) sədr müavini Zəkiyyə Mustafayeva və Azərbaycan Qida Təhlükəsizliyi İnstitutunun nəzdində fəaliyyət göstərən Analitik Ekspertiza Mərkəzinin müdiri Xalid Bayramlı ilə görüşüb.
Aztibb.az xəbər verir ki, akademik İradə Hüseynova qonaqlara Molekulyar Biologiya və Biotexnologiyalar İnstitutunda bitki xəstəlikləri üzrə aparılan elmi-tədqiqat işləri, müvafiq laboratoriyalarda yaradılmış şərait və müasir tələblərə cavab verən maddi-texniki baza, eləcə də beynəlxalq mərkəzlərlə əməkdaşlıq əlaqələri barədə geniş məlumat verib. O, institutun təcrübəli kadr potensialından danışaraq qonaqları aparıcı mütəxəssislərlə tanış edib.
Zəkiyyə Mustafayeva bitki sağlamlığı sahəsində birgə elmi araşdırmaların həyata keçirilməsinin əhəmiyyətini vurğulayıb. AQTA-nın sədr müavini, həmçinin bu sahədə təcrübə mübadiləsinin əməkdaşlığın inkişafına töhfə verəcəyini, elmi-nəzəri tədqiqatlarda və agentliyin laboratoriyaları üçün kadr hazırlığında AMEA-nın dəstəyinə ümid bəslədiklərini bildirib. O, akademik İradə Hüseynovanı mütəxəssislərlə birgə AQTA-ya dəvət edib.
Sonra Xalid Bayramlı həyata keçiriləcək birgə fəaliyyətlərlə əlaqədar təkliflər haqqında məlumat verib.
Görüşdə bitki karantin xəstəliklərinin effektiv identifikasiyası, Azərbaycanın kənd təsərrüfatı məhsullarının ixracı ilə bağlı problemlər, mütəxəssislər arasında daimi dialoqun təmin olunması və ortaq maraq doğuran digər məsələlər müzakirə edilib.