Tibb işçilərinin sertifikasiya imtahanlarında müəyyən dəyişikliklərin edilməsi nəzərdə tutulub. Nazirlər Kabinetinin ixtisasların təsnifatında etdiyi müvafiq dəyişikliklərə əsasən, rezidentura üzrə 18 yeni ixtisas əlavə olunub. Ona görə, bir sıra dəyişikliklərin edilməsi qaçınılmazdır. Yeni ixtisaslar üzrə imtahanlar təşkil edilməlidir.

Bu barədə Səhiyyə Nazirliyinin Sertifikasiya mərkəzinin rəhbəri Murad Mirzəzadə nazirliyin İnstaqram hesabında "Tibb işçilərinin sertifikasiya imtahanlarındakı yeniliklər" mövzusundakı çıxışı zamanı məlumat verib.

M.Mirzəzadə bildirib ki, tibb işçilərinin sertifikasiyası imtahanları üçün tapşırıqların tərtib edilməsi istiqamətində işlər həyata keçirilir: “Yekun qərarlarla bağlı tibb ictimaiyyətinə dəqiq məlumat veriləcək. Əsas dəyişiklik pediatriya və stomatologiya sahəsindədir”.

“Baza tibb təhsili üzrə ilk sertifikasiya imtahanlarının bu ilin oktyabrda keçirilməsi nəzərdə tutulub. İmtahan sualları hazırdır. Onu da qeyd edim ki, baza tibb təhsili üzrə sertifikasiya imtahanı üçün tərtib edilən suallar klinik mövzuludur”, - deyə Sertifikasiya mərkəzinin rəhbəri qeyd edib.