AMEA-nın Molekulyar Biologiya və Biotexnologiyalar İnstitutunun Bionanotexnologiya beynəlxalq laboratoriyasının və Rusiya Elmlər Akademiyasının Bitki Fiziologiyası İnstitutunun İdarə olunan fotobiosintez laboratoriyasının müdiri, b.e.d. Süleyman Allahverdiyev “Qlobal enerji” mükafatına layiq görülüb.

Aztibb.az xəbər verir ki, Süleyman Allahverdiyev alternativ enerji sahəsinin inkişafına verdiyi töhfələrə, süni fotosintez sistemlərinin layihələşdirilməsində əldə etdiyi nailiyyətlərə, eləcə də bio və hidrogen enerjisi üzrə apardığı elmi tədqiqatlarına görə “Qeyri-ənənəvi energetika” nominasiyası üzrə bu mükafata layiq görülüb.

Qeyd edək ki, bu il dünyanın 36 ölkəsindən 94 alimin namizəd olduğu “Qlobal enerji” mükafatının qalibi 3 alim olub. Mükafata layiq görülən digər iki alim - Rusiya EA-nın Sibir Bölməsi Kömür və Kömür Kimyası üzrə Federal Araşdırma Mərkəzinin Kömür Kimyası və Kimya Materialşünaslığı İnstitutunun direktoru Zinfer İsmaqilov və Stanford Materialşünaslıq və Energetika İnstitutunun baş elmi işçisi İ.Suy olub.

Zinfer İsmaqilov karbon materiallarının kimyası və iqlim dəyişkənliyi ilə mübarizə sahəsində, amerikalı alim İ.Suy isə energetika üçün nanomaterialların hazırlanması sahəsində əldə etdiyi nailiyyətlərinə görə bu mükafata layiq görülüblər.

Mükafat fondu 39 milyon rubl olan "Qlobal enerji"nin təqdimetmə mərasimi oktyabr ayında - Rusiya Energetika Həftəsində keçiriləcək.

Qeyd edək ki, mükafat energetika sahəsində aparılan tədqiqatları dəstəkləmək məqsədilə 2002-ci ildə Rusiya alimlərinin təklifinə əsasən təsis olunmuş beynəlxalq “Qlobal Enerji” Assosiasiyası tərəfindən verilir.