Prezident İlham Əliyevin Nazirlər Kabineti yanında Operativ Qərargaha göstərişinə uyğun olaraq, yeni növ koronavirusla mübarizə sahəsində çalışan 115 kubalı tibb mütəxəssisi ölkəmizə gəlib.

Kubalı mütəxəssislər COVID-19 infeksiyasının geniş yayılmasının qarşısının alınması istiqamətindəki tədbirlər çərçivəsində Azərbaycana dəvət olunublar.

Aztibb.az xəbər verir ki, Kubanın Azərbaycandakı fövqəladə və səlahiyyətli səfiri Alfredo Nieves Portuondo jurnalistlərə müsahibəsində Azərbaycan və Kuba arasındakı münasibətlərin inkişafından danışıb. Bildirib ki, indiki zamanda Kuba özünə doğma hesab etdiyi Azərbaycana dəstəyini əsirgəmir. Bu səbəbdən Kubadan Azərbaycana böyük tibb personalı gəlib. “Bu addım eyni zamanda həmrəylik və humanizmin göstəricisidir”, – deyə səfir vurğulayıb.

Kubadan gələn həkim briqadasının rəhbəri Deysi Torres Avela qeyd edib ki, briqada pandemiyaya qarşı mübarizədə Kubanın təcrübəsini bölüşəcək. Vurğulayıb ki, kubalı tibb işçiləri azərbaycanlı həmkarları ilə birgə COVID-19-a qarşı mübarizə aparacaqlar.

Tibbi Ərazi Bölmələrini İdarəetmə Birliyinin Beynəlxalq əlaqələr və protokol şöbəsinin müdiri Ramin Ağayev bildirib ki, Nazirlər Kabineti yanında Operativ Qərargahın dəvəti ilə ölkəmizə gələn Kuba Respublikasının tibb işçilərindən ibarət böyük heyət 3 ay müddətində Azərbaycanda olacaq.

Qeyd edək ki, Kubanın tibb mütəxəssisləri dünyanın 20-dən çox ölkəsində pandemiya ilə mübarizəyə dəstək göstərirlər.