Azərbaycan Tibb Universitetində (ATU) ardıcıl olaraq islahatların aparılması davam edir.

 

Aztibb.az xəbər verir ki, universitetin rektoru, professor Gəray Gəraybəylinin rəhbərliyi ilə universitet tədris proqramlarını dünyanın bir sıra qabaqcıl ölkələrinin, o cümlədən qardaş Türkiyənin tədris proqramlarına uyğunlaşdırmaq istiqamətində tədbirlər görür.

 

Bu barədə məlumat verən ATU-nun Əczaçılıq fakültəsinin dekanı, dosent Kamandar Yaqubov universitetdə yeni ixtisasların təşkilinə zərurət yarandığını bildirib. Onun sözlərinə görə, hazırda magistrlər magistratura pilləsində 5 ixtisas - Əczaçılığın texnologiyası, Əczaçılığın kimyası, Farmakoqnoziya, Toksikoloji kimya və Əczaçılığın təşkili üzrə ixtisaslarını artırırlar. Günün tələblərinə uyğun olaraq, bir sıra yeni ixtisasların təşkilinə ehtiyac yaranıb.

 

"Yaxın gələcəkdə Əczaçılıq menecmenti, Əczaçılıq kosmetologiyası, Farmakologiya, Klinik əczaçı, Fizioterapiya, Məhkəmə-kriminalistika ilə bağlı yeni ixtisas yerlərinin açılmasını istəyirik. Prof. Gəray Gəraybəyli adıçəkilən ixtisasların açılmasına şəxsən diqqət göstərir. Rektor, bu məqsədlə tədris proqramlarının hazırlanaraq Təhsil və Səhiyyə nazirliklərinə təqdim olunması barədə lazımi göstərişlərini verib. Biz də dekanlıq olaraq işimizi bu istiqamətdə qurmuşuq”., - deyə Kamandar Yaqubov bildirib.

 

O, təşkil olunacaq yeni ixtisasların magistrlərin bilik və bacarıqlarının artırılmasında müstəsna rol oynayacağına əminliyini ifadə edib.