Yüksək yoluxuculuğu ilə seçilən koronavirusun "alfa", "beta", "qamma" və "delta" ştamları son həftə ərzində yayılma coğrafiyasını genişləndiriblər. Xüsusilə, koronavirusun “delta” variantının dövr etdiyi ölkə və ərazilərin sayı bir həftə ərzində 142-dən 148-ə qədər artıb. 

Aztibb.az xəbər verir ki, bu barədə Ümumdünya Səhiyyə Təşkilatının (ÜST) həftəlik epidemioloji bülletenində deyilir.

"SARS-CoV-2 virusunun yeni variantlarının aşkar edilməsi üzrə fəaliyyət, genomun sıralama imkanlarının genişlənməsi də daxil olmaqla, milli və beynəlxalq səviyyələrdə gücləndikcə, narahatlıq doğuran variantların mövcudluğu barədə məlumat verən ölkə və ərazilərin sayı artmaqda davam edir". Bu barədə Ümumdünya Səhiyyə Təşkilatının həftəlik epidemioloji bülletenində deyilir.

“Alfa”, “beta”, “qamma” və “delta” ekspertlər tərəfindən “narahatçılığa səbəb olan variantlar”a aid edilib. ÜST bülletenində göstərilən məlumatlara görə, ilk dəfə 2020-ci ilin sentyabr ayında Böyük Britaniyada aşkar edilən “alfa” ştamı hazırda 190 ölkə və ərazidə mövcuddur (əvvəlki həftəyə nisbətən 5 ölkə əlavə olunub). Keçən ilin avqustunda Cənubi Afrikada aşkar edilən "beta" variantı 138 dövlətdə dövr edir (bir həftə bundan əvvəl 136 idi). Sentyabr ayında Braziliyada aşkar edilən “qamma” ştamı indi 82 ölkədə mövcuddur (əvvəlki yeddi gün ilə müqayisədə bir ölkə artıb). Öz növbəsində, Hindistanda aşkar edildikdən sonra 2020-ci ilin oktyabr ayından etibarən mütəxəssislərə məlum olan “delta” variantı, bir həftə ərzində yayılma coğrafiyasını 142-dən 148 ölkə və əraziyə qədər genişləndirib.

ÜST-ün bülleteninə görə, avqustun 9-dan 15-ə qədər dünyada yoluxma hallarının sayı əvvəlki həftəyə nisbətən 4 faiz artıb: koronavirus infeksiyasına 4,4 milyondan çox yeni yoluxma halı aşkar edilib. Eyni zamanda, ölüm hallarının sayı əvvəlki həftəyə nisbətən praktiki olaraq artmayıb; ümumilikdə avqustun 9-dan 15-ə qədər 66 mindən çox ölüm halı qeydə alınıb.

ÜST-ün avqustun 17-ə olan məlumatına görə, pandemiyanın başlanmasından bu günə qədər dünyada koronavirus infeksiyasına 207 784 507 yoluxma halı aşkar edilib, 4 370 424 nəfər həyatını itirib.