V.Y.Axundov adına Elmi-Tədqiqat Tibbi Profilaktika İnstitutu və Baytarlıq Elmi-Tədqiqat İnstitutunun birgə təşkil etdiyi “Hüceyrə kulturası və krioprezervasiyası” mövzusunda master klass avqustun 28-nə kimi davam edəcək.

Aztibb.az xəbər verir ki, proqramın əsas məqsədi uzun illərdən sonra ilk dəfə ölkəmizdə “COVID-19” daxil olmaqla, infeksion xəstəliklərə qarşı yeni mübarizə tədbirlərinin işlənib hazırlanması, diaqnostikası, kimya terapiyası, xüsusilə vaksin yaradılması ilə bağlı tədqiqatların başladılmasının əsasını təşkil edən hüceyrə kulturası modellərinin yaradılması və bu sahədə mütəxəssislərin hazırlanmasından ibarətdir.

COVID-19-un diaqnostikasında, vaksinlərin hazırlanması və effektivliyinin yoxlanılmasında son dərəcə əhəmiyyətli olan koronavirusların çoxalmasını təmin edən VERO və digər hüceyrə xətləri, leyşmanioza qarşı yeni müxtəlif növ dərman preparatları və vaksin hazırlanması üçün leyşmania parazitlərinin kulturası V.Y.Axundov adına Elmi-Tədqiqat Tibbi Profilaktika İnstitutunun laboratoriyasına gətirilib. Hazırda laboratoriyada kultura işləri başladılıb, hüceyrələr çoxaldılaraq bir qisminin maye azotda (-180° C ) deposu yaradılıb.