Yevlax Reabilitasiya Mərkəzi 2009-cu ildən fəaliyyət göstərir. Son illər müəssisədə infrastrukturun müasir tələblərə uyğun qurulması sahəsində mühüm işlər görülüb. 2019-cu ilin noyabrından müəssisə yenidən öz qapılarını müalicəyə ehtiyacı olanların üzünə açıb.

Aztibb.az xəbər verir ki, bu barədə AZƏRTAC-a Yevlax Reabilitasiya Mərkəzinin direktoru Sevinc Məmmədova danışıb.

Direktor qeyd edib ki, müəssisə 18 çarpayılıq olsa da, burada ambulator müalicələr də göstərilir: “Mərkəz Yevlax və ətraf rayonlıardan olan 18 yaşdan yuxarı ümumi əlilliyi olanlara və Qarabağ müharibəsi əlillərinə xidmət göstərir. Müəssisədə yeni, müasir tibbi-reabilitasiya avadanlıqlarından istifadə olunması və fizioterapevtik prosedurlar, müalicəvi bədən tərbiyəsi, masaj, ozonoterapiya, elektrofarez və digər prosedurların tətbiq edilməsi nəticəsində müsbət nəticələr əldə edilir. Pandemiya başlanandan sonra 100-dən çox xəstəyə stasionar, 20-dən çox xəstəyə ambulator yardım göstərilib. Son vaxtlar mərkəzdə sosial-psixoloji reabilitasiya şöbəsi açılıb. Şöbəyə əsas müraciətlər Vətən müharibəsi qaziləri, şəhid ailəsi üzvləri və onların yaxınlarından daxil olur. Həmin kateqoriyadan olan 150-dən çox xəstəyə psixoloji yardım göstərilib. İndiyədək mərkəzin həkim və mütəxəssislərinin qayğısı sayəsində 100-dən çox xəstəyə fizioterapevtik yardım edilib”.

Müraciətlərin kifayət qədər çox olduğunu söyləyən müəssisənin rəhbəri bildirib ki, aparılan müalicə prosedurları əksər halda uğurlu nəticələr verir və qazilərimiz xidmətimizdən razı qalırlar.