“Son günlər yoluxanların sayında artım müşahidə olunmaqdadır. Qarşıdan payız aylarının gəlməsi ilə, xüsusilə oktyabr ayının ortalarından sonra üst tənəffüs yolları infeksiyaları, mövsümi viral infeksiyalarda artışın görülməsi istisna edilmir. Payızda digər viral infeksiyalar kimi, COVID-19 virusuna yoluxmada da artımın olması ehtimalı böyükdür. Lakin ötən illə müqayisədə, ölkəmizdə peyvəndlənmənin aparılması, xəstəxanaların payız mövsümünə daha hazırlıqlı olması, çarpayıların sayının artırılması kimi amillər də nəzərə alınmalıdır”.

Bu barədə Aztibb.az-a Tibbi Ərazi Bölmələrini İdarəetmə Birliyindən (TƏBİB) bildirilib.

Qeyd olunub ki, hazırda Azərbaycanda COVID-19-a qarşı 4 peyvənddən istifadə olunur. Hazırda “Sinovac” şirkətinin “CoronaVac” vaksininin koronavirusun delta ştamına qarşı nə dərəcədə effektivlik göstərməsinə dair tədqiqatlar kifayət qədər deyil. Əhalimizin böyük bir hissəsinin bu vaksinlə peyvənd olunduğunu nəzərə alsaq delta ştamına yoluxma zamanı peyvəndin effektivliyi barədə öncədən proqnoz vermək doğru deyil.

Bununla yanaşı, Delta ştamının əlamətlərinin digər ştamlarla müqayisədə, daha çox adi soyuqdəymə əlamətlərinə bənzəməsi insanlarda bunun adi qrip olması kimi çaşqınlıqlar yarada bilir.

Bildirilib ki, proqnozlara görə, bütün Avropada avqust ayının sonunda COVID-19-a yoluxan xəstələrin 90 faizində delta ştamına rast gəlinəcək. Ölkəmiz də Avropaya yaxın olduğundan delta variantının geniş yayılma ehtimalı çoxdur.