Azərbaycan Tibb Universitetinin Tədris Terapevtik Klinikasının şöbə müdiri, radioloq-həkim Aydın Əliyev son zamanlar qapanmalara gediləcəyi ilə əlaqədar səsləndirilən fikirlərə münasibət bildirib. 

"Əgər yoluxma və ölüm sayı “artarsa”, peyvənddən əvvəlki yoluxma və ölüm sayına çatarsa və ya onu keçərsə, yenidən sərt karantin tətbiq edilsə, bu zaman sual ortaya çıxır. Peyvəndləmənin və bu qədər vəsait xərcləməyin nə faydası oldu? Rəsmi statistikaya görə, 3 milyona yaxın insan 2-ci doza, 5 milyondan çox insan isə 1 doza peyvənd edilib. Rəsmi və qeyri-rəsmi ən azı 1 milyondan çox insan da yoluxub sağalıb immunitet qazanıb. Heç bir elmi məntiqə uyğun deyil ki, bundan sonra yoluxma və ölüm sayı peyvənddən əvvəlki qədər və ya ondan çox olsun! Əgər olarsa, mən buna inanmayacam", - A.Əliyev qeyd edib. 

Həkim əlavə edib ki, yoluxma və ölüm sayı Azərbaycandan az olan, əhali sayı isə ölkəmizlə eyni olan Belarusda heç bir karantin tətbiq olunmayıb. 

"Yoluxma sayı artıb deyə insanları qorxutmayaq. Önəmli olan yoluxma sayı deyil, ağırlaşma və ölüm faizidir. Bu çox deyilsə, heç bir panikaya əsas yoxdur", - deyə A.Əliyev bildirib.